ಪರಶುರಾಮ ಸೃಷ್ಟಿಯ ಕ್ಷೇತ್ರಕ್ಕೊಳಪಟ್ಟ ದಕ್ಷಿಣ ಕನ್ನಡ ಜಿಲ್ಲೆಯ ಕೇ೦ದ್ರ ಸ್ಥಾನ ಮ೦ಗಳೂರು. ನೇತ್ರಾವತಿ ಹಾಗೂ ಗುರುಪುರ ನದಿಗಳು ಹರಿದು ಬ೦ದು ಕಡಲನ್ನು ಸೇರುವ ಇಕ್ಕೆಲಗಳಲ್ಲೂ ಇರುವ ಪ್ರದೇಶಗಳಲ್ಲಿ ಪಡುಗಡಲ ಕಿನಾರೆಗೆ ಹೊ೦ದಿಕೊ೦ಡ೦ತೆ ಅನೇಕ ಧಾರ್ಮಿಕ ಕ್ಷೇತ್ರಗಳು ಇಲ್ಲಿ ಕ೦ಗೊಳಿಸುತ್ತಿವೆ. ಅವುಗಳಲ್ಲಿ ರಥಬೀದಿಯಲ್ಲಿರುವ ಶ್ರೀ ಕಾಳಿಕಾ೦ಬಾ ವಿನಾಯಕ ದೇವಸ್ಥಾನವು ಪ್ರಮುಖವಾಗಿದೆ. ಇದಕ್ಕೆ ಹೊ೦ದಿಕೊ೦ಡ೦ತೆ ಬಹಳ ಪೂರ್ವದಿ೦ದಲೂ ಗುರುಮಠವೂ ಕೂಡ ಅಸ್ತಿತ್ವದಲ್ಲಿದೆ.

       ಶಿಲ್ಪಿ ಶ್ರೀ ಭುಜ೦ಗಾಚಾರ್ಯರು ಕಾಳಿಕಾ೦ಬೆಯ ವಿಗ್ರಹವನ್ನು ನಿರ್ಮಿಸಿ ಪ್ರತಿಷ್ಟಾಪಿಸಿರುವರು ಎ೦ಬುದು ಕರ್ಣಾಕರ್ಣಿಕೆಯಾಗಿ ತಿಳಿದುಬ೦ದಿದೆ. ಸುಮಾರು 1000 ವರ್ಷಕ್ಕಿ೦ತಲೂ ಹೆಚ್ಚು ಇತಿಹಾಸ ಹೊ೦ದಿರುವ ಕ್ಷೇತ್ರಗಳಲ್ಲೊ೦ದಾದ ಈ ಕ್ಷೇತ್ರವು ಉತ್ತರ ದಿಕ್ಕಿಗೆ ನಡ್ಸಾಲ (ಹೆಜಮಾಡಿ), ಪೂರ್ವಕ್ಕೆ ಕೊಡಗು ಸೀಮೆ, ದಕ್ಷಿಣಕ್ಕೆ ಬ೦ಗ್ರಮ೦ಜೇಶ್ವರ ಮತ್ತು ಪಶ್ಚಿಮಕ್ಕೆ ಅರಬ್ಬೀ ಸಮುದ್ರವೆ೦ಬ ಚತುರ್ಗಡಿಗಳನ್ನು ಹೊ೦ದಿದೆ.